Alakrana´-ko tripulazioaren senideak Auzitegi Nazionaleko presidentearekin batzartuko dira gaur

`Alakrana´-ko tripulazioaren senideak Auzitegi Nazionaleko presidentearekin batzartuko dira gaur

Abdu Willyren abokatua Fiskaltzarekin jarriko da harremanetan gaur goizean "irtenbideak proposatzeko"

`Alakrana´ atunontzi bermeotarran bahituta daudenen senideak 07:00etan abiatu dira Bilbotik Madrilera. Izan ere, gaur, 13:00etan Auzitegi Nazionaleko presidente Angel Juanesekin batzartuko dira. Espainian kartzelaratuta dauden bi piratak Somaliara bueltan eramateko dauden aukerei buruz galdetuko diote.

Senideak "itxaropentsu" abiatu dira Madrilera. Argi Galbarriatu ontziko kapitainaren arrebak "emaitzak lortzea espero dutela" esan du bidaia hasi aurretik. Jose Luis Rodriguez Zapatero Espainiako Gobernuko presidentearekin batzartzea eskatu dutela ere adierazi dute senideek.

kanporatzeak aske uztea ekarriko luke
Francisco Javier Diez Aparicio Abdu Willy kartzelaratuta dagoen ustezko pirataren abokatuak gaur goizean komunikabide bati azaldu bezala, berak "Espainian dauden bi piratak Somaliara kanporatzearen aldeko apustua egin du". Hala ere, haren hitzetan, "kanporatzeak bi piratak aske uztea ekarriko luke".

Kanporatzea Espainiako Gobernuaren esku dagoen neurria dela azaldu du eta hiru eguneko kudeaketa beharko luke. Estradizioa, berriz, "irreala" izango litzatekeela uste du Diez Apariciok, "epe luzerako irtenbidea litzateke. Zortzi edo bederatzi hilabeteko prozesua eskatuko luke".

Goizean zehar Auzitegi Nazionaleko Fiskaltzarekin harremanetan jarriko dela esan du "irtenbideak proposatzeko" asmoz.